1784. Аберагальна-напамінальны ліст

Яўхім Храптовіч (1729-1812), літоўскі падканцлер, які тройчы ў 1773, 1784 і 1792 абараняў гарадэнцаў ад імя вялікага князя

Станіслаў Аўгуст з Божае ласкі кароль польскі, вялікі князь літоўскі, рускі, прускі, мазавецкі, жамойцкі, падольскі, падляскі, валынскі, інфлянцкі, кіеўскі, смаленскі, северскі і чарнігаўскі.

Пану Міхалу Агінскаму, вялікаму гетману Вялікага княства Літоўскага, старасту, і пану Матэвушу Бутрымовічу, гродскаму суддзю Пінскага павета, арандоўнаму ўладальніку гродскага стараства.

Абвяшчаем гэтым Нашым Аберагальна-напамінальным лістом, што паны радцы, якія знаходзяцца пры Нашай асобе, пры пададзенай ад гарадэнскіх мяшчан просьбе данеслі Нам, што Вы ўва ўладанні Вашым, шукаючы заўсёды памнажэння прыватных Вашых карысцяў з крыўдаю і прыгнётам людзей, нягледзячы ні на якія прывілеі і нададзеныя ім папярэднікамі Нашымі лісты, а насупраць, усе папярэднія пастановы з Вашае сваволі перамяніўшы, не толькі што пад імем розных грашовых збораў змушаеце да ўсякіх платаў, але, павялічваючы заўсёды паншчыну і іншыя павіннасці выдумкамі супраць звычаю і звыш даўніх інвентароў таго стараства, мяшчан гарадэнскіх, даведзеных да крайняе галечы і ўбоства, абцяжарваеце. Калі гэта справядліва, то Мы, кароль, кіруючыся звыклаю Нашаю для бедных людзей ласкаю, гэтым Нашым ахоўным лістом Вас папярэджваем, здароўе і жыццё тых мяшчан забяспечваем і ад усякіх нападаў, пабояў, арыштаў, затрыманняў, гвалту Вашых і Вашых адміністратараў і намеснікаў аберагаем і ахоўваем. І каб Вы мяшчан гарадэнскіх прыгнятаць, біць, арыштоўваць і абцяжарваць не насмельваліся найстражэй загадваем пад пагрозаю штрафаў на парушальнікаў лістоў Нашых, у агульным законе прадпісаных.

Дадзены ў канцылярыі Нашай Вялікага княства Літоўскага 18 лістапада року ад Раства Хрыстова 1784, панавання Нашага ў дваццаты. На імянны Яго каралеўскае вялікасці загад (падпісаў) Яўхім Храптовіч, падканцлер Вялікага княства Літоўскага (МП).

Аберагальна-напамінальны ліст з аховаю здароўя і жыцця гарадэнскіх мяшчан выдадзены.

На баку напісана: 1784 року месяца снежня 11 дня, перад актамі Пінскага земскага суда з’явіўшыся асабіста Сцяпан Шпудэйка і Якаў Пешка, такі Аберагальна-напамінальны ліст з аховаю здароўя і жыцця, ад найяснейшага караля літасцівага гаспадара мяшчанам гарадэнскім выдадзены, у акты ў выглядзе пераносу падалі – прыняў (падпісаў) Леў Радзевіч рэгент земскі і гродскі Пінскага павета.

Паводле дакументаў НГАБ пераклаў Валер Кісель